ཐ་ཤལ་བ་ང་།

ནང་དོན་མདོར་བསྡུས།

      «ཐ་ཤལ་བ་ང»ཞེས་པའི་འགུལ་བརྙན་དེའི་ནང་གི་མི་སྣ་གཙོ་བོ་གྷུ་རུ་ལ་ཆུང་དུས་ནས་ཕུགས་བསམ་ཞིག་ཡོད་པ་ནི།  ཆེན་པོ་ཆགས་རྗེས་མཁའ་སྐྱོད་པ་ཞིག་བྱས་ནས་ཟླ་བ་གོ་ལའི་ཐོག་འགྲོ་ཐུབ་པ་བྱ་རྒྱུ་དེ་རེད།  ཉིན་ཞིག་གློག་བརྙན་ནང་མི་སྤྱིར་བཏང་ཞིག་གིས་ཨེ་ཇེབ་ཀྱི་གཏོར་གཟུགས་མཆོད་རྟེན་བརྐུས་ཕྱིན་པའི་གནས་ཚུལ་ཞིག་གསལ་བསྒྲགས་བྱས་པས།  གྷུ་རུ་ཁོང་ཁྲོ་ཆེན་པོ་ལངས་ནས་ལས་ཀ་དེ་འདྲ་ཁོ་གཅིག་པུ་ལ་དབང་བ་ལས་མི་གཞན་གྱིས་བྱས་ན་རང་ཉིད་ཀྱི་གཉའ་ཕབ་པར་བསམ་ནས་ང་རྒྱལ་གྱིས་མ་བཞག་པར་ནམ་མཁའི་ཟླ་བ་ལེན་ཐུབ་པའི་འཆར་གཞི་ནན་ཏིག་ཅིག་གཏིང་བ་དང་།  སྟབས་མ་ལེགས་པར་གྷུ་རུས་རྐུས་ཡོང་བའི་སྐུམ་འཐེན་མེ་མདའ་དེ་མགོ་བདེ་ཅན་ཝི་ཁི་ཐོས་འཕྲོག་ཕྱིན་པ་རེད།   དེར་བརྟེན་གྷུ་རུས་མེ་མདའ་དེ་རང་ཉིད་ལ་ཚུར་ཐོབ་པའི་ཆེད་དུ་ཐབས་ཤེས་སྣ་ཚོགས་བཏང་མཐར་དྭ་ཕྲུག་བུ་མོ་གསུམ་གསོས། བསམ་ཡུལ་ལས་འདས་པ་ཞིག་ལ་བུ་མོ་གསུམ་པོས་གྷུ་རུའི་འཚོ་བ་ལ་འགྱུར་ལྡོག་ཆེན་པོ་བཏང་བ་རེད།  ཁོ་ཚོས་དུས་རྒྱུན་གྷུ་རུ་ལ་རེ་བ་མང་པོ་འདོན་གྱི་ཡོད་དེ་ཉལ་ཁར་བྱིས་སྒྲུང་ཤོད་དགོས་པ་དང་ཁོ་ཚོ་སློབ་གྲྭར་བསྐྱལ་དགོས་པ། གཟའ་མཇུག་ལ་སྤྱི་གླིང་ལ་ཁྲིད་དགོས་པ་སོགས་གྷུ་རུ་ཁོང་ཚོའི་འདོད་པ་ལྟར་བསྟུན་དགོས་འཁེལ་བས་དེ་ལྟར་ཁོ་ཚོ་ཕན་ཚུན་འབྲེལ་འདྲིས་ཟབ་པོ་བྱུང་ཞིང་བརྩེ་བའང་ཟབ་མོ་ཆགས།    ཁོས་ཟླ་བ་བརྐུ་རྒྱུ་དེ་བརྗེད་མེད་པས་ཉིན་ཞིག་བུ་མོ་གསུམ་པོ་བག་ལེབ་ཚོང་བར་བཏང་སྟེ་ཝི་ཁེ་ཐོའི་བཙན་མཁར་ནང་འཛུལ་བཅུག་པ་དང་ཝི་ཁེ་ཐོ་མགོ་འཁོར་ཤུལ་དུ་མེ་མདའ་ཁྱེར་ཏེ་ཟླ་བ་རྐུ་བར་ཕྱིན། འོན་ཀྱང་ཁོས་ཟླ་བ་བརྐུས་ནས་ཚུར་འཁོར་ཡོང་དུས་བུ་མོ་གསུམ་པོ་མགོ་བདེ་ཅན་ཝི་ཁེ་ཐེས་བཙན་བཟུང་བྱས་ནས་ཁྲིད་ཕྱིན་པས་གྷུ་རུ་ཁོང་ཁྲོ་དང་སེམས་འཚབ་ངང་ཁོང་ཚོ་འཚོལ་བར་ཆས་མཐར་གྷུ་རུས་ཟླ་བ་དེ་ཝི་ཁེ་ཐེ་ལ་སྤྲད་ནས་བུ་མོ་གསུམ་དང་བརྗེས་ཤིང་རང་ཁྱིམ་དུ་ལོག་པ་དང་།   ཝི་ཁེ་ཐེ་ནི་ཟླ་བ་འཁྱེར་ནས་རང་ཁྱིམ་དུ་ལོག་པའི་ལམ་བར་དུ་ཟླ་བ་ཇེ་ཆེར་སོང་ནས་མཐར་མཁའ་དབྱིངས་སུ་འཕགས་ཏེ་སྔར་བཞིན་གྱུར་བས་ཁོ་ནི་ནམ་ཡང་ཟླ་བའི་གོ་ལའི་ཐོག་ཏུ་ལུས་སོང་།

       《ཐ་ཤལ་བ་ང》ནི་གླིང་བཞི་གློག་བརྙན་མཐུན་གཉེར་ཁང་དང Illumination Entertainment གཉིས་ཀྱིས་མཉམ་དུ་བསྒྲུབས་པའི་རྩ་གསུམ(D3)རྣམ་པ་ཅན་གྱི་འགུལ་རིས་གློག་བརྙན་ཞིག་ཡིན་ལ་བྱིས་སྒྲུང་གི་རྣམ་པར་ཆེས་ཆེར་མངོན་ཡོད།   ཐ་ཤལ་བ་གྷུ་རུ་ཟེར་བ་ཞིག་གིས་ནམ་མཁའི་ཟླ་བ་རྐུ་བའི་འཆར་འགོད་བྱས་པའི་གཏམ་རྒྱུད་ཅིག་བརྗོད་ཡོད།
   གློག་བརྙན་འདིའི་སྒྲིག་སྦྱོར་ཇུས་འགོད་དང་འཆར་ཡན་གྱི་རྩོམ་སྟངས་འདི་ནི་ངོ་མ་མི་སེམས་འགུལ་བ་ཞིག་རེད་ལ།   དེའི་ནང་ནས་ཀྱང་མཚར་སྣང་གིས་ཁེངས་པའི་བྱིས་པ་ཞིག་ལ་མཚོན་ན་དངོས་ནས་བརྩམས་ཆོས་ཡག་པོ་ཞིག་འདུག  
      གཞན་གློག་བརྙན་གྱི་བརྗོད་བྱའི་ཐད་ནས་བལྟས་ན།  ཐ་ཤལ་བ་གྷུ་རུ་ཟེར་བ་དེ་དངོས་ནས་ཐ་ཤལ་བ་ཞིག་ཡིན་མིན་ནི་གློག་བརྙན་དེར་བལྟས་ཟིན་པ་ཞིག་ཡིན་ན་ཕལ་ཆེར་ཧ་གོ་གི་རེད།  འོན་ཀྱང་གློག་བརྙན་གྱི་ཁ་བྱང་ཙམ་ལས་གོ་ཐོས་མེད་པ་ཞིག་གིས་གྷུ་རུ་ནི་ཐ་ཤལ་བ་ངོ་མ་ཤིག་ཡིན་པར་འདོད་རྒྱུ་རེད།  རང་དངོས་ནས་བརྗོད་ན་གྷུ་རུ་དང་འདྲ་བར་མི་ཚང་མ་ཐ་ཤལ་བ་ཡིན་པའི་དུས་ཀྱང་ཡོད་པར་འདོད་མོད།  དེ་ཡང་རང་ཉིད་ཐ་ཤལ་བ་ཞིག་ཡིན་ན་དེ་དངོས་ཟིན་མིན་གཙོ་བོ་ཡིན་པ་དང་འཚོ་བའི་གདམ་ག་གང་འདྲ་ཞིག་ལ་ཡང་དག་པའི་ལྟ་བ་འཛིན་པའི་ཁྱད་པར་ཤིན་ཏུ་གལ་ཆེན་པོ་ཡིན།   གྷུ་རུའི་ཐོག་མའི་ཧམ་སེམས་དང་གདུམ་སྤྱོད་ནི་དངོས་ནས་བློ་ཕམ་པ་ཞིག་འདུག་མོད།  རྗེས་སུ་ཟོལ་མེད་ཀྱི་དྭ་ཕྲུག་བུ་མོ་གསུམ་གྱིས་ཁོའི་འཚོ་བའི་རིན་ཐང་དང་དམིགས་ཡུལ་ལ་འགྱུར་ལྡོག་ཆེན་པོ་བཏང་བ་དང་ནང་སེམས་སུ་ཉལ་བའི་ཁྲེལ་གཞུང་དང་བརྩེ་འདང་གིས་བདེ་སྐྱིད་ཀྱི་འཚོ་བ་ཞིག་གི་དྲོད་འཁོལ་བསུས།
        གང་ལྟར་མཐའ་མཇུག་གློག་བརྙན་འདི་ལ་སྡོམ་ཚིག་ཅིག་བཞག་ན།   ཚན་རིག་ལག་རྩལ་དར་བས་ཕྱི་ཡུལ་གྱི་དངོས་པོའི་འཕེལ་རྒྱས་མིའི་རིགས་ཀྱི་དམིགས་པའི་བསྙེག་བྱ་ཞིག་ཏུ་ཆགས་ཡོད་ཀྱང་།  ད་དུང་བདེ་སྐྱིད་ལ་མེད་དུ་མི་རུང་བ་ནི་བརྩེ་འདང་དང་ཁྲེལ་གཞུང་གསོན་པོ་ཡིན་པ་དམར་རྗེན་དུ་བརྗོད་ཡོད།

དཔྱད་མཆན་ཡོད།